حكينا بالمقال السابق عن الريادة المجتمعية و اللي عرفناها بانها :

هي الفكرة المبتكرة التي بتعالج قضية اجتماعية و تكون هالقضية قابلة للتطبيق كمشروع ريادي يحل المشكلة و يحقق اثرا مجتمعي و بنفس الوقت بيأمن مصدر دخل يحقق استدامة المشروع

بتقدم الريادة المجتمعية الخدمة بشكلين :

خدمة مأجورة – خدمة غير مأجورة

حكينا بالقال السابق عن المشاريع اللي بتقدم خدماتها بشكل غير مأجور و رح نحكي بهالمقال عن المشاريع اللي تقدم خدماتها بشكل مأجور

بتقوم هي المشاريع على تقديم خدمات بتحل مشكلة مجتمعية او تقدم خدمة لفئة معينة من المجتمع بس هالخدمة تكون بالمصاري و هي المصاري بيتم استثمارها حتى تأمن استمرارية المشروع مو بهدف تحقيق الأرباح و الأجور اللي بتطلبها هي المشاريع بتكون قليلة و كمان هي المشاريع بتامن شغل لاشخاص هم غالبا من ذوي الاحتياجات الخاصة .

و الأمثلة على هي المشاريع كتيرة نذكر منها :

  1. مقهى الايادي البيضاء في كركوك:
    مقهى الايادي البيضاء هو مقهى خاص للصم البكم موجود بكركوك بيستقبل بس الصم و البكم وما بيستقبل اشخاص عاديين و الكادر اللي بيشتغل بالمقهى هو أيضا من الصم و البكم.
    بهذا المقهى بيحسنو الصم و البكم انو يتواصلو مع بعضهم و مع الكادر بلغتهم الخاصة و بيحكو مشاكلهم و بيتشاركو قصصهم و بياخذ من زباينو اجرة القعدة بالمقهى لكن المبلغ بيكون اقل من المقاهي التانية بس مشان يغطي المصاريف
  2. مدرسة الجزائر الخاصة بغزة: هي المدرسة بلشت بدعم من احد أبناء غزة المغتربين مشان تستقبل الأطفال المعاقين و تعلمهم و بتاخذ منهم رسوم قليلة اذا تقارنها برسوم المدارس الخاصة التانية
  3. مركز رعاية المسنين في إسطنبول: هذا المركز افتتح لاستقبال كبار السن و العجزة و رعايتهم مقابل رسوم تكفي بس تكاليف سكنهم و خدمتهم بالمركز
  4. ورشة احمد جولاق في ادلب: هذا الشب السوري شاف انو المصابين اللي بيستخدمو الكراسي اللي تشتغل عالكهربا ( اللي صار عددهم كبير جدا بسورية) هدول المصابين عندهم مشكلة تامين الشحن للكراسي حتى يحسنو يتحركو اكتر طبعا هي تعتبر مشكلة في سورية نتيجة عدم توفر الكهربا

هون احمد صمم شمسية تتركب عالكرسي تحمي الشخص من الشمس و من المطر إضافة انو سطح هي الشمسية هو لوح شمسي يامن شحن لبطارية الكرسي و هيك صار المصاب يحسن يتحرك لمسافة 10 كم باريحية

طبعا احمد يقدم هالخدمة مقابل اجر قليل بيغطي تكاليفو و تكاليف المشروع بس

و المشاريع اللي متل هيك كتيرة و ريادية بكل معنى الكلمة من ناحية انو هي عم تقدم خدمات اجتماعية و تحل مشاكل و تامن فرص عمل بس لساتها عم تواجه مشاكل قانونية من ناحية هل هي مشاريع خيرية و لا مشاريع ربحية إضافة لمشاكل الضرائب و انو ما في لهلا مراجع عربية بمجال الريادة المجتمعية و تدريبات بهالمجال

و مافي فرص للرواد المجتمعيين ليتبادلو الخبرات و التجارب

عطونا كمان امثله لمشاريع خدمات مجتمعية ماجورة!